ತೃಣ

ತೃಣ

ಸಾಗರದ ಮುಂದೊಂದು ಹನಿನೀರು ತೃಣವಂತೆ

ಶತಕೋಟಿ ಮಳೆಹನಿಯು ಸುರಿದಿಲ್ಲವೆ?

ಗಂಟೆಗಳ ಮುಂದೆ ಒಂದು ಕ್ಷಣ ತೃಣವಂತೆ

ಗಡಿಯಾರದಲಿ ಚಲಿಸೊ ಮುಳ್ಳಿಲ್ಲವೆ?

ಅರಣ್ಯಗಳ ಮುಂದೆ ಒಂದು ಸಸಿ ತೃಣವಂತೆ

ತಾ ಬೆಳೆದು ನೆರಳನ್ನು ನೀಡಿಲ್ಲವೆ?

ಇಷ್ಟು ಗಿಡವಿದ್ದರೂ ಗುಬ್ಬಿ ತಾ ಬಳಸುವುದು

ಗೂಡು ಕಟ್ಟಲು ಈ ತೃಣವಲ್ಲವೆ?

 ನೀನಾಗು

 ಕರಿಮೋಡ ಕರಗಿ ಧರೆಗಿಳಿವ ನೀರಾಗು

ಕವಿದಿಟ್ಟ ಗೂಡಿನಲಿ ಬೆಳಗೊ ಹೊಂಬೆಳಕಾಗು

ಗೊಂದಲದ ದಿನದಂದು ತಿಳಿನೀಲ ಬಾನಾಗು

ಅಲೆಯಾಗು ಕಡಲಿನೊಳು, ಹರಿವ  ತೊರೆಯಾಗು

ಸುಡು ಸುಡುವ ಸೆಕೆಯಲ್ಲಿ ತಣ್ಣಗಿನ ನೀರಾಗು

ಉರಿಬಿಸಿಲ ಬೇಗೆಯಲಿ ಹೆಮ್ಮರದ ನೆರಳಾಗು

ಮೈಕೊರೆವ ಚಳಿಯಲ್ಲಿ ಬೆಚ್ಚನೆಯ ಗೂಡಾಗು

ಗೋಳುಜಂಜಾಟದೊಳು ನೆಮ್ಮದಿಯ ಸೂರಾಗು

ಕಡು ಕಟುಕತನದೆದುರು ಜಯಜಯಿಸೊ ಹಠವಾಗು

ಬರಿದಾದ ಬಾನಿನಲಿ ಮಿಂಚಾಗಿ ಮಿನುಗು

Ms. Spoorthi N M

1st Year B.Sc

Kateel Ashok Pai Memorial College, Shivamogga